
Muhammad ibn Ahmad al-Beruniy orta arnawlı islam bilim jurtında “XATMANA – 2024” pitkeriw keshesi bolıp ótti.
Bul kesheni bilim jurt direktorı J.Abdirazakov ashıp berdi hám keshemizge kelgen miymanlardı qatnasıwshılarǵa tanıstırdı.
Ilajǵa Qaraqalpaqstan Respublikası Ministrler Keńesi baslıǵınıń sociallıq hám diniy shólkemler boyınsha orınbasarı R.Nurazizov, Qaraqalpaqstan musılmanları qazıyatı qazısı B.Razov, bilim jurtı oqıtıwshıları, xızmetkerleri, talabaları hám olardıń ata-anaları qatnastı.
Ilaj Quranı káriym tiláwatı hám duwalar menen baslandı. Ilaj dawamında R.Nurazizov pitkeriwshilerdi Qaraqalpaqstan Respublikası Ministrler Keńesi atınan qutlıqlap, pitkeriwshilerdiń aldaǵı jumıslarında tabıslar tiledi. Sѳz náwbeti Qaraqalpaqstan musılmanları qazıyatı qazısı B.Razovqa berildi. Ol óz gezeginde pitkeriwshilerge nasiyatların berip keshemizge kelgen ata-analardı usı bayram menen qutlıqladı. Soń bilim jurtı direktorı J.Abdirazakov pitkeriwshilerge aldında turǵan juwapkershilikli isleri haqkında toqtap ótti ham aldaǵı iygilikli islerinde tabıslar tiledi.
Ilaj dawamında keshemizge kelgen miymanlar hám bilim jurtı direktorı tárepinen óz ádep-ikramlıq pazıyletleri menen basqalarǵa ѳrnek bolıp hár qıylı ruwxıy-aǵartıwshılıq is-ilajlarda belsendi qatnasıp sıylı orınlar alıp kelgen talabalarǵa húrmet jarlıqlar menen sawǵalar tapsırıldı.
Sonday-aq, úlgili talabalardıń ata-analarına bilim jurtı jámááti atınan alǵısnamalar berildi.
Ilaj sońında bilim jurtı talabaları tárepinen Quran tiláwat qılınıp, sawabı Watanımız, xalqımız, dinimiz ushın usı elde xızmet etken ulamalarǵa, ustazlarǵa hám basqa da marhumlarǵa baǵıshlandı.
Usı tárizde «Xatmana – 2024» pitkeriw keshesi kóterińki ruwxta juwmaqlandı.
Bilim jurtı baspasѳz xızmeti