“MUHAMMAD IBN AHMAD AL-BERUNIY” ORTA ARNAWLÍ ISLAM BILIM JURTÍ
Nókis qalasındaǵı “Muhammad ibn Ahmad al-Beruniy” orta arnawlı islam bilim jurtı 1992 jıldan óz jumısın baslaǵan hám oǵan ullı alım, tariyx, geografiya, filologiya, astronomiya, matematika, geodeziya, mineralogiya, farmakologiya, geologiya hám basqa kóplegen pánlerge baylanıslı shıǵarmalar avtorı, Orta Shıǵısta birinshi márte Jerdiń Quyash átirapında aylanıwı múmkinligin aytıp, Jerdiń sheńber ólshemin anıqlaǵan alım Muhammad ibn Ahmad al-Beruniydiń atı berilgen.
Bilim jurtında talabalar zaman talaplarına say bilim alıwı ushın barlıq qolaylıqlar jaratılǵan. Atap aytqanda, eń zamanagóy oqıw quralları menen támiyinlengen oqıw xanaları, málimleme-resurs orayı, dáretxana, asxana, jataqxana, sport zalı, mini futbol maydanshası, salamatlıq xanası, shashtárezxana bar.
Búgingi kúnge kelip bilim jurtında 148 talabaǵa 21 oqıtıwshı tárepinen tálim-tárbiya berip kelinbekte.
Bilim jurtında tálim alıp atırǵan talabalarǵa arnawlı diniy pánlerden tısqarı, jámiyetlik-siyasiy, sociallıq-gumanitar pánler, tábiiy pánler, anıq pánler hám sonıń menen bir qatarda házirgi waqıtta dúnyada júz berip atırǵan jámiyetlik-siyasiy ózgerisler, Watanımız tariyxında iz qaldırǵan ullı alımlar, olardıń shıǵarmalarınıń búgingi kúndegi áhmiyeti haqqında da arnawlı sabaqlar ótiledi.
Bilim jurtı oqıtıwshıları hám talabaları Ózbekstan kólemindegi diniy bilim jurtları arasında ótkerilip kelinetuǵın túrli tańlawlarda, bellesiwlerde hám sport jarıslarında múnásip qatnasıp, joqarı orınlardı iyelep kelmekte.
Atap aytqanda, bilim jurtı talabaları Ózbekstan musılmanları mákemesi janındaǵı meshit hám medreseler arasında diniy-aǵartıwshılıq tarawın bunnan bılayda rawajlandırıw maqsetinde hár jılı shólkemlestiriletuǵın “Sarhisob” tańlawında 2014–2017-jılları “Radio jónelisi boyınsha” 1-orındı iyelegen bolsa, 2020-jılı bolsa «Televidenie jónelisi boyınsha» «Ádepler ǵáziynesi» kórsetiwi 2-orınǵa múnásip dep tabıldı.
Diniy bilim jurtları talabaları arasında bolıp ótetuǵın “Barkamal áwlat–2017”, “Barkamal áwlat–2019” sport jarıslarında bilim jurtı talabaları komandalıq esapta birinshi orındı iyelegen bolsa, “Barkamal áwlat–2022” sport jarıslarında bilim jurtı úshinshi orındı qolǵa kirgizdi.
Diniy bilim jurtları talabaları arasında ótkerilgen “Biz jaslar jat ideyalarǵa qarsımız–2017” intellektuallıq bellesiwde de talabalarımız birinshi orındı iyeledi.
Bilim jurtı pitkeriwshisi Yuldashbay Nuriddinov bir neshe márte diniy bilim jurtları arasında bolıp ótken Quran jarısları jeńimpazı, 2013-jılı Quveyt mámleketinde bolıp ótken xalıqaralıq Quran jarısınıń 7-orın iyesi, Prezidentimiz baslaması menen ótkerilgen «Ózbekstan Quran jarısı–2018» tańlawınıń gran-pri jeńimpazı, Prezident sawǵası jeńimpazı ekeni menen hár dayım maqtanısh etemiz.
2022-jılı orta arnawlı hám joqarı diniy tálim mákemeleri arasında «Watandı súyiw iymannandur» atamasındaǵı shıǵarmalar tańlawında bilim jurtı talabası A.Atamuratov 3-orındı iyeledi.
Ótken jıllar dawamında bilim jurtınıń 5 mudarrisi Qaraqalpaqstan Respublikası Xalıq bilimlendiriw ministrligi tárepinen “Qaraqalpaqstan xalıq bilimlendiriw aǵlası” kókirek belgisi menen sıylıqlandı.