
9-may «Eslew hám qádirlew» kúni múnásibeti menen bilim jurtında veteran nuraniy ustaz aǵalarımız benen ushırasıw keshesi bolıp ótti.
Bul ushırasıwǵa bilim jurtımız ustaz oqıtıwshıları, talabaları hám bilimlendiriw tarawınıń rawajlanıwına kóp jıllar dawamında miynet etip jumıs islegen veteran aǵamız B.Sultanov qatnastı.
Jıynalıstı bilim jurtı direktorı J.Abdirazakov kiris sózi menen ashıp berdi hám qatnasıwshılarǵa 9-may «Eslew hám qádirlew kúni» mámleketimizde ulıwmaxalıqlıq bayram sıpatında belgilenetuǵınlıǵın aytıp ótti. Búgingi belgilenip atırǵan bayramımız sonday kún, bul bayram usı elde jasap atırǵan hár bir shańaraqqa, hár bir úyge tikkeley baylanıslı bolǵan, olardıń ómirine qandaydur tereń iz qaldırǵan tariyxıy sáne esaplanatuǵınlıǵın aytıp sóz náwbetin keshemiz miymanına berdi.
Búgingi ushırasıw miymanı B.Sultanov óz bayanatında Xalqımızǵa tán bolǵan miyrim-shápáát hám múriwbet bárshe bayramlarımız sıyaqlı «Eslew hám qádirlew kúni» mısalında da ayqın kórinedi. Ótkenler yadı sonday ruwxıy-kúsh qúdiret, ol insannıń insanlıǵın ańlatıwshı, onı ótmish hám keleshek penen baylap turıwshı ullı qádiriyat, iláhiy nemat esaplanadı. Eslew – xalıq mápi ushın gúresken, el-jurt húrmetine miyassar bolǵan adamlarǵa bolǵan joqarı húrmet belgisi ekenligin qatnasıwshılarǵa aytıp ótti.
Ushrasıw sońında qatnasıwshılar ózlerine qızıqtırǵan sorawların berip tiyisli juwaplar aldı
Bilim jurtı baspasóz xızmeti