
Búgin, yaǵnıy 16-fevral sánesinde Muhammad ibn Ahmad al-Beruniy orta arnawlı islam bilim jurtı talabaları ushın Berdaq atındaǵı Qaraqalpaq ádebiyatı tariyxı mámleketlik muzeyine ekskursiya shólkemlestirildi.
Bunnan gózlengen baslı maqset – talabalardıń bos waqıtların mazmunlı ótkeriw, xalıqtıń mádeniyatı hám tariyxı haqqında bilimin arttırıw bolıp esaplanadı.
Ilaj dawamında talabalar muzey qánigeleri tárepinen Berdaq Ǵarǵabay ulınıń ómiri hám dóretiwshiligi, arxeologiyalıq eksponatlar, kollekciyalar, súwretshilerdiń belgili kartinaları, dóretiwshilik miynetleri menen tanıstırıldı.
Sonday-aq, qaraqalpaq xalqınıń etnografiyası, hayal-qızlardıń milliy kiyim-kenshekleri, zergerlik buyımları, úrp-ádet dástúrleri haqqında keń túrde maǵlıwmatlar berildi.
Sayaxat dawamında talabalar qánigelerden ózlerin qızıqtırǵan sorawlarǵa juwap aldı.