
Usı jıldıń 06-15 oktyabr kúnleri aralıǵında "Muhammad ibn Ahmad al-Beruniy" orta arnawlı islam bilim jurtı kishi sport maydanshasında «Sport - salamatlıq girewi» uranı astında jarıs shólkemlestirildi.
Bul futbol jarısı derlik eki hápte dawamında joqarı keypiyatta, salamat báseki ruwxında ótti. Talabalar óz komandaları menen jeńis ushın gúreser eken, óz-ara húrmet, jámáátlik hám sportqa bolǵan mehirlerin kórsetti. Bellesiwlerde hár bir topar jeńiske múnásip oyın kórsetti, tamashagóyler bolsa hár bir gol hám háreketti qızǵın alǵıslar menen baqlap bardı.
Atap ѳtetuǵın bolsaq, bul jarıs A-V-S topar bolıp úshke bólinip hár bir toparda úsh tórt komandadan jámlenip jámi 11 komanda bolıp oyınǵa qatnastı. Jarıstıń dáslepki oyınında A toparınan, V toparınan hám S toparlarınan jeńimpazlar anıqlanıp, keyingi basqıshqa jollama aldı.
Búgin 15-oktyabr kúni bellesiwdiń yarım final hám final basqıshları bolıp ótti.
Bul jarıs qızǵın máwritlerge bay boldı desek, asıra aytqan bolmaymız.
Bellesiw juwmaǵına kóre, 4-B kurs talabalarınan dúzilgen topar 3-orındı iyeledi. 2-A kurs talabalarınan dúzilgen topar 2-orındı iyeledi. 4-S kurs talabalarınan dúzilgen topar 1-orındı iyeledi.
Jeńimpaz bolǵan toparlar bilim jurtı jámááti tárepinen taryalap qoyılǵan 1-2-3-dárejeli diplom hám sawǵalar menen sıylıqlandı. Sonday-aq jarıs barısında eń jaqsı darwazaban, eń jaqsı xújimshi, eń jaqsı oyınshılar anıqlanıp olarda xúrmet jarlıqlar menen sıylıqlandı.
Jarıs juwmaǵında Qaraqalpaqstan musılmanları qazıyatı qazısı B.Razov, Qaraqalpaqstan Respublikası Ministrler Keńesi baslıǵınıń sociallıq hám diniy shólkemler boyınsha sekretariat basqarıwshısı J.Yusupov hám de bilim jurtı direktorı J.Abdirazakovlar jarıs qatnasıwshıların jeńisleri menen qutlıqlap, aldaǵı oqıӯlarında tabıslar tiledi.
Bilim jurtı baspasѳz xızmeti