
Allah taala Quranı káriymde: «Olar Rábbimiz, Óziń bizlerge hayallarımızdan hám zúryadlarımızdan kózimiz quwanıshın ber hám bizlerdi taqwalılarǵa jolbasshı qıl!» - deytuǵınlar.
Furqan súresindegi bul ayatı káriymada Allah taalaǵa súyikli bendelerdiń eń shıraylı sıpatlarınan biri zikir qılınǵan. Yaǵnıy, bul duwa Rahman sıpatlı Allah taalaǵa súykimli bendelerdiń qılatuǵın duwalarınan.
«Rábbimiz, Óziń bizlerge hayallarımızdan hám zúryadlarımızdan kózimiz quwanıshın ber…». Yaǵnıy, hayallarımız bizler ushın dúnya hám aqırette baxıt-saadat alıp kelsin. Sebebi, jaqsı hayal kúyewiniń dúnya hám aqıretlik islerinde de, kómekshi boladı. Dúnyada ushırasatuǵın qıyınshılıqlarǵa dus kelgende olardı jeńip ótiw ushın zayıbına sabır-taqat tileydi, onıń kewlin kóterip oǵan járdemshi hám súyenish boladı. Kúyewi jumıstan sharshap kelgeninde, ashıq júz benen kútip aladı, dem alıwı ushın orın tayarlaydı, úy-ishin tazalap, azada tutadı. Qolınan kelgeninshe kúyewiniń kewlin alıwǵa háreket qıladı. Sonday sıpatlarǵa iye bolǵan hayal erkek ushın Allah taalanıń bergen úlken nemati. Óytkeni, bir erkek ushın saliha jubaydan, halalınan kóre jaqsı nemat joqlıǵı hádisi sháriyfte aytılǵan.
Hakim Termiziy óziniń «Nawadirul usul fiy ahadiysir rosul» atlı miynetinde qanday hayal jaqsı ekenligi haqqında bólek bap ajratıp, dáliyl sıpatında tómendegi hádisi sháriyfti keltiredi: «Rasulullah sallallahu alayhi wa sallam: «Bendege dúnyada berilgen nematlar ishindegi eń jaqsısı onıń iymanın bekkemlewge kómeklesetuǵın mómina hayal», dedi.
Durıs, insan balası ushın Allah taala bul dúnyada qanshadan-qansha nematlardi bergen. Álbette, bende usı berilgen nematlarǵa shúkir qılıwı kerek. Hádisi sháriyfte bolsa, dúnyada berilgen nematlardıń eń jaqsısı kúyewiniń iymanın bekkemlep, onıń iyman nurınıń zıyada bolıwına kómeklesetuǵın mómina, saliha hayal zikir qılınıp atır. Demek, saliha, mómina hayal bir erkekke bul dúnyada berilgen Allah taalanıń jaqsılıǵı eken.
Luqmanı Hákiym aytadı: «Saliha hayal patshanıń basındaǵı tajǵa al jaman hayal qartayǵan ǵarrınıń ústine artılǵan júkke uqsaydı» degen.
Allah taala bárshelerimizge kózimizdiń quwanıshı bolıp, bizlerge baxıt-saadat baǵıshlaytuǵın hayallar hám perzentlerdi nesip etsin!
Muhammad ibn Ahmad al-Beruniy orta arnawlı islam bilim jurtı oqıtıwshısı Haytmurat Erejepov