MUHAMMMAD IBN AHMAD AL-BERUNIY” ORTA ARNAWLÍ ISLAM BILIM JURTÍ

Bilim jurtında talabalar zaman talaplarına say bilim alıwı ushın barlıq qolaylıqlar jaratılǵan. Atap aytqanda, eń zamanagóy oqıw quralları menen támiyinlengen oqıw xanaları, málimleme-resurs orayı, dáretxana, asxana, jataqxana, sport zalı, mini futbol maydanshası, salamatlıq xanası, shashtárezxana bar.

“Quranı kárim hám tájwid” pullı oqıw kursları

Ózbekstan Respublikası Prezidentiniń “Diniy-aǵartıwshılıq tarawınıń jumısın túpkilikli jetilistiriw ilajları haqqında”ǵı 2018-jıl 16-apreldegi PP-5416-sanlı Pármanı menen tastıyıqlanǵan ilajlar Baǵdarlamasınıń 6-bántinde belgilengen wazıypalardıń orınlanıwın támiyinlew maqsetinde Ózbekstan musılmanları mákemesiniń 2018-jıl 30-apreldegi 01A/056-sanlı buyrıǵı tastıyıqlanǵan. Usı múnásibet penen Muhammad ibn Ahmad al-Beruniy medresesinde 2018-jıl 10-iyunnan baslap “Quranı kárim hám tájwid” úyretiw boyınsha pullı oqıw kursları shólkemlestirildi.

Málimleme resurs orayı

Muhammad ibn Ahmad al-Beruniy” orta arnawlı islam bilim jurtınıń málimleme resurs orayı fondında jámi 17756 kitap saqlanbaqta. Sonnan, 1505 ulıwma bilimlendiriw ádebiyatları, 4085 arnawlı pánlerden sabaqlıqlar, 764 sociyallıq-ekonomikalıq ádebiyatlar, 7340 ilimiy-ǵalabalıq ádebiyatlar, 919 elektron ádebiyatları quraydı.

Kurslar

2018-jıl 10-iyunnan baslap “Quranı kárim hám tájwid” úyretiw boyınsha pullı oqıw kursları shólkemlestirildi.

Talabalar

Búgingi kúnge kelip bilim jurtında 148 talabaǵa 21 oqıtıwshı tárepinen tálim-tárbiya berip kelinbekte.

Jetiskenliklerimiz

Bilim jurtı oqıtıwshıları hám talabaları ótkerilip kelinetuǵın túrli tańlawlarda qatnasıp joqarı orınlardı iyelep kelmekte.

JASLARDÍ JAT IDEYALARDAN SAQLAWDA MÁZHABTÍ BEKKEM USLAWDÍŃ ÁHMIYETI

Allah taalaǵa Onıӊ ullılıǵına jarasa hamdu sáneler bolsın! Payǵambarımız Muhammad Mustafaǵa salawat hám sálemler bolsın!

Búgingi kúnde dúnyada globallasıw processi háwij alǵan bir waqıtta jaslardı túrli jat ideyalogiyalardıń unamsız tásirlerinen asırap-abaylaw hámmemizdiń moynımızdaǵı minnetimiz bolıp tabıladı. Jaslarımızǵa hám olardıń kóz-qarasına, sana-sezimine hám itiqadına túrli ideyalogiyalar qáwip salıp atır. Bunday jaǵdayda aqıydası salamat bolmaǵan jaslardıń adasıp ketiwi kóp boladı. Ásirese, házirgi waqıtta jaslardıń aqıydasına qáwip salıp atırǵanlar ishinde muqaddes Islam dinimizdi nıqap etip, milliy qádiriyatlarımızdı ayaq astı etip atırǵan buzǵınshı háreketler iskerligi bárshemizdi bul máselede itibarlı bolıwǵa shaqıradı. Allah taala bul haqqında Quranı káriymde bılay deydi:

«…jaqsılıqqa buyır, nadanlardan júzińdi bur!» (Arof súresi, 199-ayat).

Demek, insanlardı jaqsılıqqa buyırıp, hár túrli adasqan aǵımlardan júz burıp, olardan uzaq bolıwımız kerek eken. Hár túrli ideyalogiyalar tásirinde joldan adasqan «Mázhabsızlar», «Saqta salafiyler» sıyaqlı aǵımlar óz iskerligin birinshi gezekte xalqımız ásirler dawamında ámel etip kelgen hanafiy mázhabına qarsı gúresiwden, onıń ullı ulamaları hám olar jazǵan kitaplarǵa tas atıwdan, olardı jaman atlı qılıwdan basladı. Sebebi, búgingi kúnde hanafiyler dúnya musılmanlarınıń yarımın (50%) quraydı. Demek, bunday aǵımlar ushın musılmanlardı birlestirip turǵan hanafiy mázhabı olardıń aldında turǵan eń úlken tosıqlardan biri sanaladı. Sonlıqtan, olar birinshi orında mine usı hanafiy mázhabına taslar atadı, qarsı gúresedi. Demek, bunday aǵımlardıń ideyalogiyalarınan jaslarımızdı qorǵawda hanafiy mázhabımızdı bekkem uslawımız, jaslarımızdı mine usı tálimat hám qádiriyatlar tiykarında tárbiyalawımız lazım boladı. Tárbiyanıń bul tárepi jaslardı tiykarınan rasgóylik, amanatdarlıq, materiallıq, basqalarǵa mehir-aqıbetlı etip hám milliy qádiriyatlarımız tiykarında tárbiyalawdı óz ishine aladı. Sonlıqtan, perzentlerimizdiń tek ǵana materiallıq támiynatın emes, al olardıń bos waqıtlarında ne menen shuǵıllanıp atır, internet, komyuter, telefon hám sociallıq tarmaqlardan qanday paydalanıp atırǵanında qadaǵalap barıw arqalı olardı bul aǵımlardıń unamsız tásirlerinen asırap-abaylawımız múmkin boladı.

Muhammad al Beruniy islam bilim jurtı mudarrisi Nizamatdinov Tólegen