MUHAMMMAD IBN AHMAD AL-BERUNIY” ORTA ARNAWLÍ ISLAM BILIM JURTÍ

Bilim jurtında talabalar zaman talaplarına say bilim alıwı ushın barlıq qolaylıqlar jaratılǵan. Atap aytqanda, eń zamanagóy oqıw quralları menen támiyinlengen oqıw xanaları, málimleme-resurs orayı, dáretxana, asxana, jataqxana, sport zalı, mini futbol maydanshası, salamatlıq xanası, shashtárezxana bar.

“Quranı kárim hám tájwid” pullı oqıw kursları

Ózbekstan Respublikası Prezidentiniń “Diniy-aǵartıwshılıq tarawınıń jumısın túpkilikli jetilistiriw ilajları haqqında”ǵı 2018-jıl 16-apreldegi PP-5416-sanlı Pármanı menen tastıyıqlanǵan ilajlar Baǵdarlamasınıń 6-bántinde belgilengen wazıypalardıń orınlanıwın támiyinlew maqsetinde Ózbekstan musılmanları mákemesiniń 2018-jıl 30-apreldegi 01A/056-sanlı buyrıǵı tastıyıqlanǵan. Usı múnásibet penen Muhammad ibn Ahmad al-Beruniy medresesinde 2018-jıl 10-iyunnan baslap “Quranı kárim hám tájwid” úyretiw boyınsha pullı oqıw kursları shólkemlestirildi.

Málimleme resurs orayı

Muhammad ibn Ahmad al-Beruniy” orta arnawlı islam bilim jurtınıń málimleme resurs orayı fondında jámi 17756 kitap saqlanbaqta. Sonnan, 1505 ulıwma bilimlendiriw ádebiyatları, 4085 arnawlı pánlerden sabaqlıqlar, 764 sociyallıq-ekonomikalıq ádebiyatlar, 7340 ilimiy-ǵalabalıq ádebiyatlar, 919 elektron ádebiyatları quraydı.

Kurslar

2018-jıl 10-iyunnan baslap “Quranı kárim hám tájwid” úyretiw boyınsha pullı oqıw kursları shólkemlestirildi.

Talabalar

Búgingi kúnge kelip bilim jurtında 148 talabaǵa 21 oqıtıwshı tárepinen tálim-tárbiya berip kelinbekte.

Jetiskenliklerimiz

Bilim jurtı oqıtıwshıları hám talabaları ótkerilip kelinetuǵın túrli tańlawlarda qatnasıp joqarı orınlardı iyelep kelmekte.

ISLAM TARIYXÍ

Allah taalaǵa Onıӊ ullılıǵına jarasa hamdu sáneler bolsın! Payǵambarımız Muhammad Mustafaǵa salawat hám sálemler bolsın!

Islam dinin úyreniwde tiykarǵı ilimlerden biri «Islam tariyxı» ilimi desek asıra aytqan bolmaymız. Islam tariyxı degende Islam mámleketleriniӊ hám musılman xalıqlardıӊ Islam dininiӊ baslanǵısh dáwirinen baslap házirgi kúnge shekemgi bolǵan múddettegi tariyxı názerde tutıladı. Yaǵnıy, bul tariyx dúnya baslanǵannan berli házirgi, bizler jasap turǵan waqıtqa shekemgi dáwirdi óz ishine aladı. Shayx Hasan ibn Abdullah rahmatullahi alayh tariyxtı úyreniwge qızıqtırıp, bılay deydi: «Tariyx barlıq ótken áwladlardıӊ ómir medresesi bolıp tabıladı. Tariyx arqalı tiriler ózleri ushın paydalı nárseni úyrenip, oǵan ámel qıladı. Sonday-aq, ózlerine zıyan jetetuǵın nárselerden xabardar bolıp, onnan shette boladı. Tariyx – bir úmmet óziniӊ ótmishine barıp keletuǵın hám búgini menen ótmishi ortasınan orın alǵan kópir».

Islam tariyxi Islam dinindegi Quranı káriym, táfsir, hádis, fiqh sıyaqlı bir qansha ilimler menen bir qatarda rawajlanıp bardı. Islam tariyxın kitaplarǵa jazıw hijriy III, miladiy IX ásirde kelip baslanadı. Usı dáwirden baslap islam tariyxı haqqındaǵı maǵlıwmatlardı kitaplarǵa jazıw, olardı túrli dáwirlerge bólip úyreniwge ayrıqsha itibar beriledi. Tariyx iliminiӊ rawajlanıwında musılman tariyxshılarınıӊ xızmeti júdá úlken. Olar islam tariyxın úyrenip, bul haqqında kelgen maǵlıwmatlardı izertlep, óz kitaplarına eӊ isenimli xabarlardı keltiredi. Buǵan Ibn Asir rahmatullahi alayhtıӊ tariyx haqqında jazǵan «Al-kámil fit-tariyx» kitabın mısal keltiriwimiz múmkin.  

Waqıt ótiwi menen tariyx iliminiӊ ishinde Payǵambarımız Muhammad sallallahu alayhi wa sallam tariyxın úyreniwshi siyrat ilimide óz aldına bir ilim sıpatında ajıralıp shıǵıp, Islam tariyxın úyreniwde júdá úlken úles qosıp kelmekte. Búgingi kúnde siyrat ilimi de islam tariyxı menen birgelikte jurtımızdaǵı medreselerde oqıwshılarǵa úyretiledi.

Nókis “Muhammad ibn Ahmad al-Beruniy”  orta arnawlı islam bilim jurtı oqıtıwshısı Tolegen Nizamatdinov