
Búgin, bilim jurtı sport maydanında «Bes baslama olimpiadası» sheńberinde ótkeriletuǵın «Medrese kubogı»na arnalǵan sporttıń «Kishi futbol» túrine start berildi.
Bul jarıs xızmetkerler ushın ájayıp sport is-ilajına aylandı, buǵan Qaraqalpaqstan Respublikası Ministrler Keńesi baslıǵınıń sociallıq hám diniy shólkemler boyınsha orınbasarı R.Nurazizov, Qaraqalpaqstan musılmanları qazıyatı qazısı B.Razov hámde bilim jurtı direktorı J.Abdirazakovlar qatnasıp, jarıs qatnasıwshılarına áwmetler tiledi.
Bul jarısqa Qaraqalpaqstan musılmanları qazıyatı qánigeleri toparı bir komanda, Ózbekstan xalıqaralıq islam akademiyası janındaǵı qánigelik arttırıw orayınıń Qaraqalpaqstan Respublikası aymaqlıq filialına qánigeligin arttırıw ushın Xorezm wálayatı hámde Qaraqalpaqstan Respublikası aymaǵınan kelgen imam-xatib hám imam-nayıbları toparınan eki komanda, bilim jurtı oqıtıwshıları toparı bir komanda hám xızmetkerler toparınan bir komandalarınan ibarat bolıp ulıwma bes komanda búgingi jarısqa qatnastı.
Komandalar jámlegen jarıs qızǵın bellesiwlerge bay tárizde bolıp ótti. Kishi futbol jarısı usı kúnniń ózinde juwmaqlandı hám jarıs sońında jeńimpazlarǵa dárejelestirilgen diplom sawǵalar berildi.
Búgingi jarısta jeńimpaz bolǵan komandaǵa bilim jurtı kubogı hám 1-dárejeli diplom sonday-aq, jarıstıń ekinshi, úshinshi orın alǵan komandalarına 2-3 dárejeli diplom hám sawǵalardı Qaraqalpaqstan Respublikası Ministrler Keńesi baslıǵınıń sociallıq hám diniy shólkemler boyınsha orınbasarı R.Nurazizov tárepinen tapsırıldı.
Sonıń menen bir qatarda komandalar ishinde oyın waqtında ózleriniń sheberligi menen belsendi qatnasqan oyınshılarǵa eń jaqsı darwazashı, eń jaqsı qorǵawshı, eń jaqsı yarım qorǵawshı, eń jaqsı hújimshi hám eń jaqsı oyınshı nominacialar belgilenip bilim jurtı direktorı J.Abdirazakov tárepinen húrmet jarlıqlar hám qımbat bahalı sawǵalar tapsırıldı.
Sońınan barlıq jarıs qatnasıwshılarına aldaǵı jumıslarında tabıslar tilep jarıstı juwmaqladı.
Bilim jurtı baspasóz xızmeti