Ассалаўма алейкум

ѲЗБЕКСТАН МУСЫЛМАНЛАРЫ БАСҚАРМАСЫ

“МУҲАММАД ИБН АҲМАД АЛ-БЕРУНИЙ”

орта арнаўлы ислам билим журтының рәсмий веб-сайтына хош келдиңиз

Елимизде Ғәрезсизлигимиз шарапаты менен зия ҳәм мәрипат ошағы болған мешит ҳәм медреселер өз жумысын баслап, халқымыздың руўхый тәрептен болған мүтәжликлерине мүнәсиб тәризде хызмет етип киятыр. ...

ҲИЗБШЫЛАРДЫҢ “ИСМАТУЛ ӘНБИЯ” МӘСЕЛЕСИНДЕГИ ҚӘТЕЛЕРИ ҲАҚҚЫНДА

443
16 Июль 2021

"Исматул әнбия", деп Пайғамбарлардың үлкен ҳәм киши гүналардан аманлығы, Аллаҳ таала оларды гүналардан сақлап қойыўына айтылады. Үммет бирлигине зыян жеткизиўде дин душпанларынан қалыспайтуғын топар — ҳизбшылардың нәўбеттеги бузық ақыйдасы Аллаҳ таала таңлаған пайғамбар алайҳимуссаламлар менен байланыслы. Пайғамбар алайҳимуссаламлар Аллаҳ тааланың сүйикли бенделери болып табылады. Ең әўўелгиси ҳǝзирети Адам алайҳиссалам ҳәм ең соңғысы ҳǝзирети Муҳаммад мустафа саллаллаҳу алайҳи ўа саллам болады. Аллаҳ таала адамлар арасынан ең солиҳларын таңлап пайғамбар тайынлайды. Пайғамбар алайҳиссаламлардың ўазыйпасы үмметлерине шәрият ҳүкимлерин жеткизиўден ибарат есапланады.

Ҳизбшылардың пикирлерине көре, пайғамбарлар пайғамбарлық ўазыйпасын алғаннан кейин, Аллаҳ тааланың әмрине муўапық исте даўамлы болады. Пайғамбар болыўдан алдын болса, олар да ҳәмме қатары әпиўайы инсан болып, түрли гүна ислер ислеўи мүмкин екен. Енди қараң, олардың жетекшиси не демекте:

“… бирақ бул исмат пайғамбар ҳәм расуллерге қашан олар илǝҳий Аллаҳ тәрепинен жиберилген буйрық пенен пайғамбар ҳәм русуллик мәртебесине ерискенде ғана бериледи. Оннан алдын болса, олар да ҳәм тағы басқалар да жүз берген ислер болыўы мүмкин. Себеби, исмат бул пайғамбарлық ҳәм хабар себепли”.

(Тақийюддин Набаҳаний. “аш-Жекеят-ул-исламия”. 1-Бөлим. 120 -бет)

Уллы Ҳанафий алымы шайх Әлий әл-Қарый ҳǝзиретлери Ўсман Ўший қәлемине тийисли “Бадъул-амалий”сына жазған “Заўъул-маъали” атлы түсиндирмесинде: “Әҳли сунна ўǝл-жәмәә уламаларының бирлигине көре, пайғамбарлар ең садық, аманатгөй, ҳадал, расгөй ҳәм руўхый жетик бәркәмал инсанлар болып табылады. Себеби, Аллаҳ таала пайғамбарлық ушын жалаңқая, жалғаншы, қәсийетсиз, жалатай ҳәм сатқынларды ҳеш қашан таңламайды. Пайғамбарлар күфр иллетинен пайғамбарлықтан алдын да кейин де аманда болыўына салафи-солиҳлердиң кѳрсетпеси бар. Соның менен бирге, үлкен гүналарды көзкөреки ислеўден де сақланған сап инсанлар екенине уламалардың мақуллаўы бар”, - деп жазады.

(Шайх Әлий әл-Қарый. “Заўъул-маъали”. 80-бет).

Ҳизбшылардың исенимине көре, алдыңғы турмысында уры, жалатай, қарақшылық сыяқлы жеркенишли белгиси болған ислер менен шуғылланғанлар да пайғамбар болыўы мүмкин екен. Аллаҳ таала бул сыяқлы бузық тайпаларға қосылып, жолдан азған болып қалыўдан бәршемизди панасында Өзи сақласын!

Дереклер тийкарында Муҳаммад ибн Аҳмад әл-Беруний орта арнаўлы ислам билим журты оқытыўшысы ӘЖИНИЯЗ ЖИЙЕМУРАТОВ таярлады.



  • Автор: Админ
  • 16 Июль 2021
  • 0
  • 65

Жеке пикир

Ҳикметлер гүлдәстеси